ប្រកួត​ប្រដាល់​ខ្នាត​ធំ​ ខ្មែរ-​ថៃ ៨រូប ត្រៀម​ជួប​បរទេស​ក្នុង​សង្វៀន​តែ​មួយ

ស្ថានីយ​ទូរទស្សន៍ PNN បាន​សហការ​ជាមួយ​ក្រុមហ៊ុន​កម្សាន្ត​លំដាប់​អន្តរជាតិ Thai Fight ដើម្បី​រៀបចំ​ព្រឹត្តិការណ៍​ប្រដាល់​ដ៏​ធំ​នៅ​កម្ពុជា ឈ្មោះ​ថា Khmer-Thai Fight ក្នុង​បំណង​ចូល​រួម​លើក​កម្ពស់ និង​ផ្សព្វផ្សាយ​គុន​ខ្មែរ ដោយ​មាន​ការ​អនុញ្ញាត​ពី​ក្រសួង​អប់រំ​យុវជន និង​កីឡា ព្រម​ទាំង​សហព័ន្ធ​កីឡា​ប្រដាល់​គុន​ខ្មែរ។

ការ​ប្រកួត​ដែល​ធ្វើ​ឡើង​នៅ​ថ្ងៃ​ទី​២៥ វិច្ឆិកា ម៉ោង ៦​ល្ងាច ក្នុង​ពហុ​កីឡដ្ឋាន​ជាតិ (សាល​ប្រកួត​បាល់​បោះ/បាល់​ទះ) នេះ នឹង​មាន​កីឡាករ​គុន​ខ្មែរ​ឆ្នើមៗ ៤រូប ទល់​នឹង​កីឡាករ​បរទេស ហើយ​កីឡាករ​ថៃ ៤រូប ទល់​នឹង​កីឡាករ​បរទេស​ដូចគ្នា ពោល​គឺ​ខ្មែរ នឹង​ថៃ មិន​ប៉ះ​គ្នា​នោះ​ទេ។

អ្នក​លេង​គុន​ខ្មែរ​ឆ្នើមៗ​ទាំង៤ ដែល​នឹង​បង្ហាញ​ខ្លួន​តំណាង​កម្ពុជា នៅ​លើ​សង្វៀន Khmer-Thai Fight រួម​មាន ពេជ្រ ម្ទេស​ខ្មាំង (ប្រកួត​ទម្ងន់ ៥៦​គីឡូក្រាម) ឡៅ ចិត្រា (ប្រកួត​ទម្ងន់ ៦០​គីឡូក្រាម) ឃីម ឌី​ម៉ា (ប្រកួត​ទម្ងន់ ៦៣.៥​គីឡូក្រាម) និង ម៉ឺន សុភា (ប្រកួត​ទម្ងន់ ៧១​គីឡូក្រាម)។

ក្រៅ​ពី​នេះ ដើម្បី​កម្ដៅ​អារម្មណ៍​អ្នក​ស្នេហា​វិស័យ​កីឡា​មុន​ព្រឹត្តិការណ៍ PNN ក៏​បាន​ចាក់​ផ្សាយ​ការ​ប្រកួត Thai Fight កន្លង​មក ដែល​ធ្លាប់​មាន​កីឡាករ​កម្ពុជា​ចូលរួម​ប្រកួត​នៅ​ក្រៅ​ប្រទេស រៀង​រាល់​ថ្ងៃ​សៅរ៍ ចាប់​ពី​ម៉ោង ៩-១១​ព្រឹក។

ព័ត៌មាន​បន្ថែម​ពី​ការ​ប្រកួត ឬ​កីឡាករ ចូល​ទៅ​ផេក​ហ្វេសប៊ុក PNN Sports៕

ប្រភព៖​http://news.sabay.com.kh